Giklaro karon sa Philippine National Police (PNP) nga wala pa silay nadawat nga bisan unsang impormasyon mahitungod sa giingong hulga sa kinabuhi ni Vice President Sara Duterte.
Matud kang PNP Chief General Jose Melencio Nartatez Jr., padayon nilang gibantayan ang sitwasyon human gipadayag sa Bise Presidente nga nahadlok siya alang sa iyang kinabuhi, lakip na ang kinabuhi sa iyang pamilya.
Dugang pa sa PNP Chief, wala silay rekord nga nagsumiter o nagpahibalo sa bisan unsang estasyon sa kapulisan ang Bise Presidente kalabot sa giingong hulga sa iyang kinabuhi.
Wala usab makamonitor ang PNP og bisan unsang lehitimong hulga nga mahimong magbutang sa peligro sa kinabuhi sa Bise Presidente o sa iyang pamilya.
Gisiguro usab ni Nartatez nga abri ang PNP sa pagdawat sa bisan unsang report kalabot sa pagpanghulga, mahimo man kini pinaagi sa dokumento o pahayag, aron ilang maimbestigahan.
Gipasiguro usab sa PNP nga ilang gitahod ang katungod sa matag tawo nga mopahayag sa kabalaka alang sa ilang kaluwasan ug hustong pagtratar kanila. Apan, importante usab, matud pa sa PNP, nga adunay tukmang beripikasyon aron masiguro ang hustong impormasyon.
Sa pagkatinuod, matud sa PNP, adunay mga pulis nga mitabang kang Duterte atol sa iyang pagpiyansa sa Quezon City Regional Trial Court kagahapon, Sabado, may kalabotan sa tulo ka kaso sa grave threats. Luwas usab nga nakaabot ang Bise Presidente sa korte.
Kahinumduman nga nagduha-duha ang Bise Presidente sa pagsulod sa QC RTC ug sa pagpauban sa mga pulis tungod sa giingong hulga sa iyang kinabuhi.
Matud pa niya, iyang gitala ang matag hulga ug harassment nga iyang nasinati sulod na sa milabay nga tulo ka tuig.
Nagsugod ang maong kaso sa pahayag sa Bise Presidente atol sa usa ka online press conference niadtong 2024, diin iyang giingong adunay siya gimandoan nga mopatay kang Presidente Ferdinand Marcos Jr., First Lady Liza Marcos, ug kanhi Speaker Martin Romualdez kung siya mismo ang patyon.
