GENERAL SANTOS CITY – Dili pa ulahi ang tanan aron mupasang-at og reklamo ang mga nabiktima sa Kabus Padutuon batuk sa founder nga si Pastor Joel Apolinario og mga kaubanan sa pag-operate og investment scam.
Matud pa ni Sarangani Provincial Police Office Director PCol. Michael Lebanan nga andam ang ilang buhatan sa pagdawat sa reklamo basta adunay ikapakita nga ebidensya nga makasuporta sa ilang claim nga sila nag-invest sa KAPA.
Sa pamahayag na nasampit nga opisyal, ang tanang nakabutang nga pangalan sa warrant of arrest ang subject sa manhunt operation kung asa dakpon kung matultulan ang gikahimutangan.
Wala mihunong ang kapulisan sa Sarangani sa pagpangita sa uban pang miyembro sa KAPA nga dakpunon tungod sa giatubang nga kasong syndicated estafa nga nasuta nga walay girekomenda nga piyansa ang korte.
Samtang, gibutyag ni PCol. Lebanan, sa karon gipa-hold nila ang duha ka fishing vessel nga base sa alegasyon panag-iya sa KAPA kini human nga adunay miangkon nga sila ang nanag-iya human nga napalit matud pa ang sakayang pangdagat kay Reyna Apolinario.
Nasuta nga giaksyunan sa Securities and Exchange Commission kon SEC ang pagpangolekta og salapi sa kampo ni Apolinario og sa mga alipures sa mga katawhan dihang gipa-freeze ang tanang bahandi nga nakapangalan sa KAPA.
