GENERAL SANTOS CITY- Nagpahimangno si PNP chief PDGen. Oscar Albayalde sa mga pulis nga nalambigit sa mga investments scam.
Gipasalig niini nga dili siya magduha-duha nga palagputon sa serbisyo ang mga pulis nga nalambigit sa pagpangilad sa mga isig-kaingon.
Gibutyag sa PNP chief nga daghan sa mga pulis ang nakasuhan ug nadismiss sa serbisyo gumikan sa pagkalambigit sa investment scam.
Kini human sa mga taho nga may mga pulis nga ga-moonlightning ug gapang-recruit ug mga investors sa Mindanao partikular sa Sarangani province.
Gihingusgan ni Albayalde nga dili pwede nga may mga pulis nga malambigit sa scam.
Miapela usab si Albayalde sa publiko nga isumbong sa PNP kung may kasayuran sila sa mga pulis nga nalambigit sa mga investment scam.
Nagpahinumdum usab si PNP chief sa mga bagong recruits nga mga pulis nga usahay mga target usab sa ilang mga kaubanan nga dili magpadala sa mga gapang-recruit kanila.
