Gimando ni Philippine National Police (PNP) Chief Gen. Rommel Marbil sa kapulisan nga ihunong ang moonlighting o pagraket o sideline samtang anaa sa serbisyo.
Sumala sa PNP chief, gi-isyu niya ang maong direktiba aron magarantiya nga andam nga muresponde ug paspas ang tanang pulis sa mga reklamo sa mga katawhan ug emergency.
Responsibilidad usab sa PNP nga masiguro ang kaluwasan sa mga katawhan.
Ang kapulisan angayang mahimong andam sa tanang oras aron matubag ang panginahanglanon sa publiko.
Gibutyag pa sa opisyal nga pinaagi sa pagbawal sa moonlighting, gipalig-on niini ang ilang gipanumpaan alang sa paspas ug episyente nga pagtubag sa unsa man nga sitwasyon.
Gihimo sa PNP chief ang maong direktiba human sa pipila ka mga insidente sa moonlighting sa han-ay sa PNP lakip ang gireort bag-uhay lamang nga upat nga miyembro sa Special Weapons and Tactics (SWAT) team nga naghatag matod pa ug security service sa usa ka pribadong event sa Pasig City.
Ang maong impormasyon gibulgar ni Interior and Local Government Secretary Benjamin Abalos Jr.
Ang upat gitangtang na sa ilang puwesto human sa imbestigasyon sa Eastern Police District.
Samtang, una ng gibutyag sa PNP nga plano niining magmugna ug usa ka special team nga nakatutok sa pagpugong sa dili awtorisadong paggamit sa mga sakyanan sa PNP ug gitahasan usab nga monitoron ang mga opisyal ug sakop nga nakiglambigit sa moonlighting.
