GENERAL SANTOS CITY – Gapanawagan labaw sa Police Regional Office (PRO) 12 sa mga nabiktima sa Police Paluwagan Movement (PPM) nga maghatag sa ilang statement batok sa maong investment scam .
Kini human ang mando ni PNP Chief General Guillermo Eleazar nga subling paimbestigahan ang PPM.
Matud kang Police Brigader General Michael John Dubria, Regional Director sa PRO-12, usa ka welcome action kini sa han-ay sa kapulisan aron mahatagan ug hustisya ang mga nabiktima kung asa dili ikalimod nga daghang mga sakop sa kapulisan, mga taga gobyerno og mga sibilyan usab ang mihulog og dagkong kantidad sa salapi bugti sa dagkong interes.
Sa pamahayag sa nasampit nga opisyal, ang mga nagpaluyo sa naasoyng matang sa pagpangilad ang maoy angayang manubag sa balaud.
Gihingusgan ni Dubria nga angayang prisuhon gilayon ang mapamatud-an nga maoy utok sa PPM.
