Mibalik na sa normal nga operasyon ang Philippine National Police (PNP) human sa malampuson nilang serbisyo sa niaging midterm elections.
Sa iyang pamulong atol sa flag ceremony nga gipahigayon kaganina sulod sa Kampo, si PNP Chief PGen. Rommel Francisco Marbil niingon nga ang pagbalik sa ilang han-ay sa normal nga operasyon maoy timailhan nga ang PNP nakahimo sa ilang katungdanan sa hustong paagi bisan pa man sa pipila ka insidente nga natala atol sa piniliay.
Matod niya usa sa labing dakong kalampusan sa ilang han-ay mao ang maayong resulta sa piniliay, nga sa kinatibuk-an malinawon ug walay dagkong insidente nga natala.
Una niini, gipasalamatan sa hepe ang kapolisan nga nagbantay karong piniliay uban sa pakigtambayayong sa pipila ka military personnel sa Armed Forces of the Philippines (AFP) ug uban pa nga mitabang sa pagpatuman sa hugot nga seguridad sa mga nataran.
Human sa piniliay, gipasalig ni Marbil nga dili matapos sa piniliay ang pagtuman sa mandato sa ilang han-ay.
Matod niya nga sa ilang pagbalik sa ilang normal nga operasyon, kinahanglang ipakita sa ilang han-ay nga ang mga polis makahimo sa pagmintinar sa kahapsay ug kaluwasan sa publiko bisan sa adlaw sa piniliay.
Basta ipatuman kanunay ang kooperasyon, masiguro ang kaluwasan sa mga Filipino citizen sulod sa nasud.
Samtang, gipasalig usab sa PNP nga naresolba dayon ang mga insidente nga natala atol sa eleksyon ug ang mga solusyon gihatag usab sa han-ay niini sa pakigtambayayong sa mga lokal nga kagamhanan sa tibuok nasud.
