GENERAL SANTOS CITY – Subling nagpahimangno ang PNP Anti-cybercrime group ngadto sa publiko kalabot sa pagpost sa mga social networking sites, hilabi na sa pagpagawas sa ilang mga gibati pinaagi sa pag-post ug mga komento nga kinahanglang mag-amping sa pagpost ug unsa mang himuon sa internet.
Kini gumikan mahimong makasuhan ug libel hilabi na kon makadaot sa isig-kaingon ang posts o kaha komento nga gihimo.
Sama na lamang sa 20 anyos nga estudyante nga si Ellen Jane Amado nga giaresto kaniadtong Biyernes tungod human gikasuhan ug libel human sa makadaot nga komento sa Facebook batok sa usa ka 16 anyos nga biktima, human sila nagtubaganay sa nahisgutang social networking site.
Matud ni Police Chief Inspector Leo Dofiles, labaw sa Anti-Cybercrime Group 12, nahitabo kini kaniadtong October 2014, ug napagawas ang warrant of arrest kaniadtong August 2015.
Sumala pa nga luyo nga gi-edit sa suspek ug gipanas ang pangalan sa biktima, ulahi na gumikan daghan na ang nakakita niini, lakip ang mga paryente ug kaila sa biktima.
Hinuon, gilayong nakapiyansa si Amado ug nakaangkon ug temporaryong kagawasan.
Kahibaluan nga ang kaso ni Amado ang nag-inusarang libel case nga napasang-at dinhi sa dakbayan.
