Nagpahibalo ang Philippine National Police (PNP) nga andam na kini nga palapdan ang paggamit sa mga body-worn camera sa mga operasyon human giaprobahan sa Senado ang Senate Bill No. 1908 o ang Law Enforcement Body-Worn Camera Act.
Sumala ni PNP Chief Gen. Jose Melencio Nartatez Jr. sa usa ka pahayag niadtong Martes, ang balaodnon nagpalig-on sa mga reporma nga nagtumong sa pagpalambo sa transparency ug accountability sa mga operasyon sa pulisya.
Gipunting usab sa PNP nga ang mga body-worn camera dili lamang nanalipod sa publiko gikan sa posibleng pag-abuso, apan lakip usab ang mga opisyal sa pulisya gikan sa harassment ug mga bakak nga reklamo.
Ubos sa balaodnon, ang mga personahe sa PNP, National Bureau of Investigation (NBI), Bureau of Jail Management and Penology (BJMP), ug Philippine Drug Enforcement Agency (PDEA) kinahanglan nga magsul-ob og mga body camera atol sa mga opisyal nga operasyon.
