GENERAL SANTOS CITY – Kumpiyansa si Police Brigadier General Eliseo Tam Rasco nga walay mga pulis dinhi sa Region 12 nga nalambigit sa ‘hulidap’ kon pagpangilkil sa mga masikop sa operasyon.
Kini human nahimong hisgutanan ang nasampolan nga usa ka pulis sa National Capital Region Police Office kon NCRPO nga gikasuk-an ug taman ni NCRPO Dir. Guillermo Eleazar human masikop sa entrapment, human midawat ug P20,000 gikan sa usa ka dinakpan sa buy-bust operation, bugti sa kagawasan niini.
Matud ni B/Gen. Rasco, walay susamang insidente nga natala dinhi sa Rehiyon 12.
Sumala pa nga kanunay gayud nilang ginapahinumduman ang mga sakop nga kanunay’ng himuon ang insakto ug ligal sa ilang trabaho.
Ug gani, plano matud pa nilang himuon sa PRO-12 Headquarters nga matag oras ipahinumdum sa mga sakop ang mga angayang himuon ug hinumdumon isip mga tigpatuman sa balaod.
Hinuon, giangkon ni B/Gen. Rasco nga kapin 10 ka dismissal sa mga sakop nga pulis ang iyang napirmahan sa pagkakaron, nga kasamtangan matud pang gipailawom sa proseso gumikan sa katungod usab sa mga nahisgutan nga muapela.
