Nakahukom ang Constitutional Court sa South Korea nga ibalik si Prime Minister Han Duck-soo isip acting president human gibasura ang kasong impeachment batok kaniya.
Sa desisyon sa korte, 7 sa 8 ka mga mahistrado ang nisupak sa impeachment ni Han samtang usa lang ang pabor sa pag-impeach sa opisyal.
Matod sa 5 ka mga mahistrado, balido ang impeachment motion batok kang Han apan walay igong basehan ang pagtangtang kaniya tungod kay wala siya makalapas sa konstitusyon o sa balaod sa Republic of Korea kalabot sa deklarasyon sa martial law o posibleng insureksyon.
Sa laing bahin, ang 2 ka mga mahistrado mihukom nga ang impeachment motion batok kang Han, kinsa maoy acting president niadto, invalid gikan sa sinugdanan tungod kay ang mosyon napakyas sa pagpasa sa parliament human mapakyas sa pagkab-ot sa gikinahanglan nga two thirds nga boto sa mga magbabalaod.
Kahinumduman nga si Han maoy mipuli sa gi-impeach nga Presidente sa South Korea nga si Pres. Yoon Suk-yeol tungod sa iyang mubo og napakyas nga deklarasyon sa martial law niadtong Disyembre 2024.
Apan, wala pay 2 ka semana human sa paglingkod sa katungdanan, si Han gi-impeach ug gisuspenso niadtong Disyembre 27, 2024 tungod sa iyang giingong papel sa deklarasyon sa martial law ug sa iyang pagdumili sa pagtudlo og tulo pa ka mga mahistrado sa Constitutional Court aron sa pagdesisyon sa impeachment ni Yoon, hinungdan nga nga giakusahan siya sa opposition sa impeachment trial ni Yoon nga iyang kaalyado.
