Gilauman nga ang mga pasahero kinahanglan nga mobayad og mas mahal nga plete sa eroplano sa unang 15 ka adlaw sa Agosto.
Kini human gipataas sa Civil Aeronautics Board (CAB) ang passenger fuel surcharge ngadto sa Level 13 para sa mga biyahe gikan Agosto 1 hangtod 15.
Kini mas taas kaysa Level 8 nga gipatuman gikan Hulyo 16 hangtod 31.
Ubos sa bag-ong lebel, ang fuel surcharge sa mga domestic flight motaas gikan sa P423 ngadto sa P1,237, depende sa gilay-on sa biyahe. Samtang, para sa mga international flight nga mobiya gikan sa Pilipinas, kini mokabat gikan sa P1,396.74 ngadto sa P10,385.42.
Sumala sa CAB, ang pagtaas sa fuel surcharge nagsunod usab sa pagtaas sa presyo sa jet fuel sa global market human sa pagbalik sa tensyon sa Middle East.
Ang fuel surcharge wala gilakip sa base airfare ug mahimong motaas o mokunhod depende sa presyo sa jet fuel sa merkado.
