GENSAN– Nahuman sa City Engineer’s Office sa Gensan ubos sa pagdumala ni Engr. Ronald Nuñeza, ang assessment sa mga pampublikong eskwelahan human sa makusog nga linog nga miigo sa dakbayan niadtong miaging mga adlaw.
Sumala ni Engr. Nuñeza, 46 ka mga public school ang nasusi sa ilang mga team aron masiguro nga luwas gamiton ang mga classroom ug pasilidad sa pagbalik sa klase.
Sa resulta sa inspeksyon, daghang mga eskwelahan ang gihatagan ug green tag, nga nagpasabot nga safe for occupancy o pwede gamiton sa klase.
Apan adunay usab mga eskwelahan nga gitagaan ug yellow tag, nga nagpasabot nga adunay mga bahin nga restricted o dili pa pwede gamiton hangtod matapos ang repair.
Samtang usa ka eskwelahan, ang Upper Labay Elementary School, ang gihatagan ug red tag, nga nagpasabot nga off-limits o delikado gamiton tungod sa grabeng kadaut sa mga building niini.
Giklaro usab niya nga aduna lang 2 ka building sa nahisgotang eskwelahan ang wala gipagamit mahitungod sa grabeng kadaut niini.
Matod pa ni Engr. Nuñeza, padayon ang monitoring ug re-inspection sa mga apektadong eskwelahan aron masiguro ang kaluwasan sa mga magtutudlo ug estudyante.
