Natabunan karon ang pipila ka mga lugar sa gitawag nga entertainment capital sa kalibutan ang LA sa California USA ug pula ug pink nga pulbos aron mapunggan ang pagkaylap sa sunog.
Kini usa ka fire retardant nga gigamit karon sa mga bombero sa pagpalong sa mga wildfire. Sa mga video ug mga hulagway nga nag-circulate online, ang pula ug pink nga pulbos nga gihulog sa mga wildfire nga miulbo ang nakakuha sa atensyon.
Matod ps nga liboan ka galon sa maong substansiya ang gi-spray niadtong miaging semana aron mapugngan ang pagkuyanap sa kalayo.
Ang maong fire retardant usa ka produkto nga gitawag og Phos-Chek nga gibaligya sa kompanya nga gitawag og Perimeter.
Gigamit kini sa pagpalong sa mga sunog sa America sukad pa niadtong 1963 ug mao ang nag-unang long-term fire retardant nga gigamit sa California Department of Forestry and Fire Protection. Kini usab ang kasagarang gigamit nga fire retardant sa tibuok kalibutan base sa taho sa French international news agency (AFP).
Base sa kompanya nga nagpaluyo sa produksiyon sa maong fire retardant, 80% sa maong produkto kay tubig, 14% sa fertiliser-type salts, 6% sa mga color agent ug corrosion inhibitors.
Kontrobersyal usab ang paggamit niini karong bag-o tungod sa posibleng negatibong epekto niini sa kinaiyahan, hinungdan nga gimando sa Forest Service nga gidili ang paggamit sa fire retardant sa mga sensitibong lugar apan adunay mga eksepsiyon niini ilabi na kung ang kinabuhi sa tawo o kaluwasan sa mga publiko nabutang na sa peligro sa hulga sa kaylap nga sunog.
