Bisan pa sa kusog nga pagbundak sa ulan, nagpadayon ang protesta sa pipila ka grupo sa Kalaw Avenue sa Maynila karong Huwebes, Agosto 13, batok sa Pax Silica initiative sa Capas, Tarlac.
Nagmartsa ang mga raliyista gikan sa Kalaw Avenue padulong sa US Embassy apan gibabagan sila sa mga pulis.
Lakip sa mga dala sa mga nagprotesta ang mga placard nga nanawagan sa pagdili sa pagsulod ni US President Donald Trump sa Pilipinas, nga ilang gitawag nga “war criminal” ug dili welcome sa nasod.
Sa iyang pakigpulong, gikondena ni Bayan Chair Teddy Casiño ang Estados Unidos tungod sa giingong paggamit niini sa Pilipinas alang sa plano nga pagtukod og AI weapons manufacturing hub sa nasod.
Matud ni Casiño, dili angay nga dali tuohan ang mga saad sa gobyerno sa Amerika, ilabina bahin sa depensa sa Pilipinas batok sa China.
Gipahayag usab niya nga ang maong sitwasyon iyang gitandi sa nahitabo niadtong 1898, diin giingong misaad ang Estados Unidos nga motabang sa Pilipinas batok sa mga Kastila.
Sumala pa kang Casiño, posibleng moabot ang panahon nga magtinabangay ang China ug Estados Unidos ug gamiton ang Pax Silica alang sa kaugalingon nilang interes.
