Gikumpirma sa Department of Migrant Workers (DMW) nga gipagawas sa gobyerno sa Malaysia ang walo ka mga Filipino seafarer.
Ang maong mga seafarer mga tripulante sa MT Krishna kinsa gidakop tungod sa paglapas sa immigration laws ug gitanggong sa Kota Tinggi, Malaysia.
Sumala sa DMW, ang Opisina sa Prosecutor sa Johor nagpagawas ug desisyon nga buhian ang mga dinakpan nga seafarer.
Ang desisyon gipagawas pagkahuman sa pagbisita sa DMW kaniadtong Abril 18.
Ang DMW, kauban ang Overseas Workers Welfare Administration sa Kuala Lumpur, nangandam na karon sa pagpauli sa mga Filipino seafarers balik sa Pilipinas.
Nakigsulti usab ang DMW sa mga paryente sa mga seafarer, diin gipasalig nila ang ilang kaluwasan.
Kahinumduman nga niadtong Abril 11, walo ka Filipino seafarer ug 12 ka Indian crew members ang gitanggong sa Royal Malaysian Police sa Kkota Tinggi Police District Headquarters sa Johor.
Nisulod sila sa Malaysia nga walay pasaporte o bisan unsang legal nga dokumento.
