Siyam ka Pinoy nga biktima sa human trafficking sa Laos ang niabot sa nasud.
Sakay sila sa usa ka flight nga mitugpa sa Ninoy Aquino International Airport Terminal 3.
Matod sa Department of Migrant Workers (DMW), sila ang unang batch gikan sa kinatibuk-ang 73 ka mga Pilipinong biktima nga naluwas sa Golden Triangle Special Economic Zone .
Ang probinsiya sa Bokeo sa Laos gikonsiderar nga scam syndicate .
Matud sa ahensya, ang maong gidaghanon sa mga trabahante gisaaran og trabaho isip customer service representative sa Thailand.
Napugos hinuon sila sa paghimo og scamming activities sa Laos.
Kalabot niini, gipasalig ni Migrant Workers Secretary Hans Leo Cacdac nga mohatag ang gobyerno og hinabang alang sa mga naluwas nga mga Pilipino.
Ang DMW makigtambayayong sa OWWA, ug sa Inter-Agency Council Against Trafficking sa paghatag og pinansyal nga tabang.
Maghatag usab kini og libreng psycho-social support ug legal nga tabang ug uban pang serbisyo.
Samtang, ang Department of Foreign Affairs (DFA) maoy nangunay sa pagluwas sa maong mga biktima.
