GENERAL SANTOS CITY -Giproseso na sa punerarya ang patayng lawas sa usa ka lalaki nga piniriso human nga nakaplagang-patay na sulod sa Lanton Reformatory Center sa Brgy. Apopong ning dakbayan.
Giila ang maong inmate nga si James Gaspar Romero, 48-anyos, minyo nga residente sa San Pedro St., Brgy Lagao ning dakbayan.
Kagahapon, pasado alas kuwatro sa kaadlawon dihang nadiskubre mismo sa kaubang priso ang patayng lawas ni Romero sulod sa selda numero otso.
Ang nasampit ang nanggahi na ang tibuok lawas og wala na nagginhawa hinungdan nga gitaho sa prison guard.
Gilayong girespondihan sa Makar Police station ang insidente human nga nakadawat sila og tawag gikan sa maong jail facility kalabot sa hitabo.
Sa gihimong pagsusi, naabtang wala nay kinabuhi pa si Romero hinungdan nga gidala sa Dr. Jorge P. Royeca Hospital nga maoy usab nagdeklarang patay na ang maong priso.
Walay timailhan nga gipasakitan o gipatay ang maong priso tungod walay unsa mang samad sa lawas o bun-og nga timailhan nga gikulata og gipatay.
