GENSAN – Mitawag usab sa Bombo Radyo ang usa ka Pinay DH sa Riyadh, Saudi Arabia, aron magpatabang nga mapauli dinhi sa nasud.
Matud kang Benia Sempal, taga-Tupi, South Cotabato, misamot ang iyang goiter hinungdan nga nalisdan sa pagtulon ug dili na makakaon.
Hinungdan nga mihangyo matud pa siya sa iyang kasamtangang amo nga pauli-on na lang, aron mahatagan ug pagtagad ang balatian.
Hinuon, gipa-checkup matud pa siya sa amo, apan sa iyang pagpananghid nga pauli-on, misugot matud pa kini, sa kondisyon nga magbayad siya ug P28,000.
Nasayran nga kadto na ang ika-upat niyang amo, human siya gipasa-pasa ug gibaligya sa mga kanhing amo.
Samtang, dihang midangop ang sibyahanaan sa OWWA-12, gikabutyag sa nasampit nga ahensya nga gilayon silang nakig-alayon sa agency sa nasampit nga OFW, apan wala matud pa mitubag.
Hinuon gipasalig nila nga idiretso sa Riyadh ang naasoy’ng mulo, ug paningkamutan aron mapauli sa labing daling panahon sa nasud si Sempal.
