Gikondena sa Filipino community sa San Francisco, California, ang pagkamatay sa usa ka tigulang nga Pinay human kini gituklod sa usa ka lalaki samtang nagapaduol ang tren sa San Francisco, California sa Estados Unidos sa Amerika.
Tungod sa krimen nanawagan ang mga Pinoy sa maong lugar ug hustong seguridad sa mga pampubliko nga lugar.
Kahinumduman nga ang biktima mao si Corazon Dandan, 74, ug naga-trabaho isip usa ka telephone operator sa Parc 55 Hotel sa Union Square.
Gibutyag nga nahuman na ang iyang shift ug muoli na unta kini sa Daly City dihang nahitabo ang insidente sa nakalabay nga Lunes sa gabie, Hulyo 1.
Samtang ginahulat niini ang tren sa Powell street BART Station, didto na gihimo sa suspek ang krimen.
Giila ang suspek nga si Trevor Belmont, 49, nailhan usab sa pangalan nga si Hoak Taing, ang gihulagway nga usa ka transient.
Sa press release sa train station, gibutyag nga gitungkad na sa kapulisan kung unsa ang motibo sa krimen.
Si Dandan ang nag-migrate sa San Francisco sang 1980s, walay kaugalingon nga anak apan nagatabang kini sa pagpaeskwela sa iyang mga hinablos.
