Nahimo nga pinakadakong piggy bank sa kalibotan ang usa ka higanteng baboy nga hinimo gikan sa ceramic sa usa ka theme park sa Colombia isip pasidungog sa lokal nga tradisyon sa paghimo og kolon.
Ang ceramic piggy bank nga nahimutang sa Mano del Artesano — Pueblito de Barro sa Ráquira adunay gitas-on nga 29 feet ug 6.3 inches, adunay sukod nga 33 feet ug 11.8 inches, ug gibug-aton nga mokabat sa 30 tons.
Aduna kini’y lungag sulod nga mahimong masudlan sa mga bisita diin makita usab ang gallery nga naghisgot sa kasaysayan sa paghimo og ceramic piggy bank sa maong lugar.
Aduna usab kini’y coin slot diin ihulog sa mga bisita ang ilang sinsilyo nga ihatag ngadto sa lokal nga mga animal shelters.
Gisukod ni Guinness World Records Adjudicator Natalia Ramirez gamit ang satellite technology ang tukmang sukod sa maong estruktura aron mapamatud-an ang rekord, ug iyang giingong talagsaon ang katukma sa paghimo niini gikan sa yuta nga kolonon.
