Usa ka iladong breeder sa iro sa India migasto ug 500 milyones ka rupees o anaa sa P325 milyon alang sa talagsaong lahi sa iro nga kombinasyon sa wolf ug Caucasian Shepherd! .
Ang iro nga ginganlag Cadabomb Okami gipadako sa U.S. sa wala pa mapalit ni S. Satish, usa ka iladong mahiligon sa iro gikan sa Bengaluru ug presidente sa Indian Dog Breeders Association.
Siya adunay usa ka koleksyon sa kapin sa 150 ka mga iro nga lahi, lakip ang pipila sa labing lisud nga pangitaon sa kalibutan.
Matod ni Satish, ang dako nga gasto sa iyang bag-ong binuhi angayan tungod kini talagasaon ra nga lahi. Sa edad nga duha pa lang ka bulan, niabot na kini sa 75 ka kilo ug adunay gitas-on nga 30 ka pulgada.
Kay kining iro usa ra man sa kalibutan, daghan ang gusto makakita ug magpakuha ug picture , mao nga dili lang pet, negosyo pa.
Sa tinuud, gidala kini ni Satish sa lainlaing mga high-profile nga mga panghitabo, lakip ang mga premiere sa pelikula aron mabawi ang iyang puhunan.
Dili kini ang unang higayon nga nakapalit si Satish og mahalon nga iro. Sa miaging tuig, nipalit usab siya og talagsaong Chow-Chow nga giingong susama og red panda sa kantidad nga $3.25 million (P180 million).
Sa iyang pito ka ektarya nga yuta, giatiman ni Satish ang iyang mga iro ug gipakita kini sa lainlaing mga panghitabo sa India. Tungod sa dakong interes sa publiko, mokita siya og $3,000 ngadto sa $12,000 (P170,000 ngadto sa P680,000) matag kalihokan.
