Gipadayag ni Senate Minority Leader Koko Pimentel nga walay papel si Pangulong Ferdinand Marcos Jr. sa impeachment case batok ni Vice President Sara Duterte.
Matod ni Pimentel, parehas ra sila og katungod sa balaod ug parehas nga mahimong mapalagpot sa puwesto ubos sa batakang balaod.
Gisaysay niya nga dili na angay hatagan ug gibug-aton ang posisyon ni Marcos bahin sa giandam nga draft Senate Resolution nga nagtumong sa pagbasura sa pagtaral batok sa bise presidente.
Gibarugan ni Pimentel nga dako nga sayop ang pagpabasura sa impeachment case batok kang Duterte.
Sumala sa Konstitusyon, gimanduan ang Senado nga angayang “forthwith” o diha-diha nga buhaton ang impeachment trial batok sa mga opisyal nga mahimong ma-impeach.
Gipunto ni Pimentel nga walay lusot ang Senado tungod kinahanglan gyud kini mohimo og impeachment trial batok ni VP Sara.
Tungod niini, mituo si Pimentel nga posibleng molungtad ang proseso gikan sa 19th Congress padulong sa 20th Congress.
