Walay natala nga bag-ong kaso sa bird flu ang Bureau of Animal Industry (BAI) atol sa usa ka semana nga monitoring sa ahensya.
Kini ang unang higayon sulod sa halos usa ka tuig nga walay bag-ong aktibong kaso o outbreak sa avian influenza nga natala sa nasud.
Base sa record sa BAI, adunay 136 ka barangay gikan sa kinatibuk-ang 53 ka siyudad ug lungsod sa tibuok nasod ang natumbok nga apektado sa bird flu.
Gikan sila sa siyam ka probinsya ug lima ka rehiyon.
Gikan sa kalim-an ug tulo ka lungsod ug siyudad, 51 ang nitaho nga wala nay kaso sa bird flu sulod sa 90 ka adlaw samtang ang nahibilin walay outbreak gikan sa 31 ngadto sa 60 ka adlaw.
Sa kasamtangan , 17 ka probinsiya sa tibuok Pilipinas ang gideklara nga bird flu free. Kini naglakip sa Aurora, Batangas, Cagayan, Camarines Sur, Capiz, Cotabato, Davao del Sur, Ilocos Norte, Ilocos Sur, Isabela, Leyte, Maguindanao del Sur, Pangasinan, Quezon, Rizal, South Cotabato ug Sultan Kudarat.
Kon itandi sa miaging tuig, 154 ka barangay gikan sa 66 ka siyudad ug lungsod ang apektado sa bird flu.
Sa samang panahon sa miaging tuig, 14 pa lang ka probinsiya ang na-clear sa epekto sa bird flu.
