Niapil ang Pilipinas sa 95 ka mga nasud nga nipirma sa usa ka internasyonal nga deklarasyon nga nagtumong sa pagtapos sa global nga plastic pollution.
Ang deklarasyon gitawag nga “Nice Call for an Ambitious Treaty on Plastic Pollution,” nga gilusad niadtong Hunyo 10 atol sa ikaduhang adlaw sa United Nations Ocean Conference sa Nice, France.
Ang dokumento nagtumong sa pagtakda og “global target” aron makunhuran ang produksiyon ug paggamit sa mga dagkong plastik nga polymers..
Nanawagan usab kini sa mga nasud nga miyembro nga mopasalig sa hinayhinay nga pagwagtang sa mga problema sa mga produkto nga plastik ug kemikal, ingon man pagpauswag sa disenyo sa mga plastik aron makunhuran ang epekto niini sa kalikopan.
Sumala kang Agnès Pannier-Runacher, French Minister for Ecological Transition, ang lakang usa ka malampuson nga deklarasyon sa wala pa magsugod ang negosasyon alang sa ”end to plastic pollution” nga ipahigayon sa Geneva gikan sa Agosto 5 hangtod 14, 2025.
Kahinumduman nga niadtong Marso 2022, ang United Nations Environment Assembly nipasar og resolusyon alang sa usa ka global treaty nga motubag sa tibuok lifecycle sa mga plastik.
Ang nagsuporta nga mga nasud naglakip sa Pilipinas, ug uban pang mga nasud gikan sa lain-laing mga kontinente, nga nagpakita sa usa ka kolektibong tinguha sa pakigbatok sa plastik nga polusyon sa tibuok kalibutan.
