Nalakip na usab ang Pilipinas sa listahan sa 10 ka “worst countries” alang sa mga trabahante, sumala sa 2024 Global Rights Index sa International Trade Union Confederation (ITUC) nga gipagawas kagahapong adlawa Biyernes, Hunyo 6, 2025.
Kini ang ikasiyam nga sunodsunod nga tuig nga nalakip ang Pilipinas niini nga listahan, sumala sa Workers Rights Watch, lakip ang Kilusang Mayo Uno, Unyon ng mga Manggagawa sa Agrikultura, National Federation of Sugar Workers, Alliance of Concerned Teachers.
Kilusan ng Manggagawang Kababaihan, Confederation for Unity, Recognition and Advancement of Government Employees, Public Services Labor Independent Confederation, Bukluran ng Manggagawang Pilipino (BMP), Migrante Philippines, ug Center for Trade Union and Human Rights.
Gawas sa Pilipinas, ang 10 ka “worst country” alang sa mga trabahante naglakip usab sa Bangladesh, Belarus, Ecuador, Egypt, Eswatini, Myanmar, Nigeria, Tunisia, ug Turkey.
Sumala sa taho, ang Pilipinas ang adunay pinakadaghang paglapas sa katungod sa pagwelga (87%), gisundan sa katungod sa collective bargaining (80%), katungod sa pagporma o pag-apil sa unyon (75%), ug katungod sa hustisya (72%).
Sa laing bahin, si Labor Secretary Bienvenido Laguesma miingon nga ang taho wala magtagad sa mga lakang nga gihimo sa kasamtangang administrasyon aron masulbad ang dugay na nga mga isyu.
Gihatagan niya og gibug-aton nga kung ang Pilipinas tinuod nga usa sa labing daotan nga mga nasud alang sa mga mamumuo, dili unta kini mapili nga miyembro sa ILO Committee on Freedom of Association sa miaging tuig.
