Natapos sa ika-unom nga puwesto ang Philippine men’s artistic gymnastics team sa final sa 2026 Asian Games sa Nagoya General Gymnasium sa Japan.
Nakapuntos og kinatibuk-ang 227.359 ang Team Philippines nga gipangulohan sa two-time Olympic gold medalist nga si Carlos Edriel Yulo, ug nalabwan ang Vietnam ug Singapore taliwala sa walo ka teams nga nakigkompetensya.
Maayo ang pagsugod sa Pilipinas human makakuha og 38.099 sa rings ug 42.365 sa vault, apan mikunhod ang ilang ‘momentum’ sa ‘parallel bars’ diin nakapuntos sila og 36.099.
Sa maong event, mitampo sila Juancho Miguel Besana og 10.000, Karl Jahrel Eldrew Yulo og 11.933, ug Carlos Yulo og 14.166.
Nakakuha usab ang Pilipinas og 36.965 sa horizontal bar ug 38.199 sa floor exercise, diin 14.266 niini ang gikan kang Carlos Yulo.
Sa kataposang event nga ‘pommel horse’, nakapuntos ang team og 35.632 gikan sa ambag nila Zachary Nunez, Juancho Miguel Besana, ug Eldrew Yulo.
Samtang, midaog pag-usab ang China human makuha ang ilang ikatulong sunod-sunod nga gold medal sa maong event pinaagi sa iskor nga 255.095, gisundan sa host country nga Japan nga nakakuha og silver sa iskor nga 253.826 ug Chinese Taipei nga bronze nga adunay iskor nga 239.896.
