Gitangtang na sa Pilipinas ang temporaryong pagdili sa pag-import og poultry products gikan sa Belgium human sa pagrepaso sa gobyerno nga nakit-an nga igo ug episyente ang disease-control measures sa nasod batok sa bird flu o High Pathogenicity Avian Influenza.
Sa usa ka department circular, pormal nga giila sa Department of Agriculture ang regionalization protocols sa Belgium, nga nagtugot sa pagpadayon sa importasyon gikan sa mga lugar nga giila nga walay kaso sa maong sakit.
Lakip sa mga produktong gitugotan nga ma-import mao ang karne sa manok, itlog, day-old chicks, ug breeding materials.
Sumala ni Agriculture Secretary Francisco Tiu Laurel Jr., ang desisyon kabahin sa “science-based ug risk-calibrated” nga pamaagi aron mapanalipdan ang biosecurity samtang gisiguro ang igo ug baratong pagkaon alang sa mga Pilipino.
Giingon usab niya nga ang pag-ila sa regionalization measures sa Belgium nagpakita nga ang pagdumala sa sakit mahimo pinaagi sa tukmang kontrol imbes nga total ban.
Dugang sa DA, importasyon lamang gikan sa mga disease-free zones nga giila sa duha ka nasod ang tugotan aron masiguro nga dili makompromiso ang biosecurity standards sa lokal nga poultry industry.
