Gipahibalo ni Department of Foreign Affairs (DFA) Sec. Theresa Lazaro nga ang nasud nagkonsiderar sa pag-import og lana gikan sa Russia taliwala sa padayon nga pagsaka sa presyo niini tungod sa gubat tali sa Estados Unidos, Israel ug Iran.
Si Lazaro miingon nga ang Department of Energy (DOE) gihapon ang mohimo sa desisyon niini.
Kini human sa pagtangtang sa mga silot sa US batok sa krudo sa Russia taliwala sa pagsaka sa presyo sa lana sukad gisirhan sa Iran ang Strait of Hormuz.
Gipahibalo sa White House niadtong Biyernes, Marso 13 nga aron mapadayon ang kalig-on sa mga merkado sa enerhiya sa kalibutan, adunay temporaryo nga pagtugot gikan sa US sa pagpalit og natanggong nga lana sa Russia sa dagat.
Wala pa’y gihimong pahayag ang Malacañang ug ang DOE bahin niini.
Mahinumduman nga bag-o lang gipahibalo ni Presidente Bongbong Marcos nga ang nasud nangita og ubang mga tinubdan sa lana tungod sa pagsaka sa presyo nga gipahinabo sa nagpadayon nga kagubot sa Middle East.
Kon bahin sa suplay, gipasalig sa Presidente nga ang kahimtang sa Pilipinas anaa sa maayong kahimtang.
