GENSAN- Giawhag sa Philippine Institute of Volcanology and Seismology (PHIVOLCS) ang publiko nga padayon nga palig-onon ang ilang kahibalo ug kaandam batok sa mga linog human sa kasinatian sa makusog nga magnitude 7.8 nga linog nga miigo sa Mindanao.
Sumala kang Nane Danlag, Officer-in-Charge sa PHIVOLCS General Santos, nakita sa mga video nga mikaylap sa social media nga daghan gihapon ang nakulbaan ug wala makahibalo sa hustong paagi sa pagresponde atol sa linog. Matud niya, adunay mga tawo nga mihilak, nag-panic ug nag-hyperventilate tungod sa kakulba sa nahitabo.
Tungod niini, gipasabot ni Danlag ang kamahinungdanon sa padayon nga pagpatuman sa National Simultaneous Earthquake Drill o NSED sa mga eskwelahan, opisina ug uban pang mga institusyon aron kanunay nga mapahinumduman ang publiko sa angay buhaton sa panahon sa kalamidad.
Gipasiugda usab niya nga importante nga masayran sa matag usa ang mga nangunang lakang sa wala pa, panahon ug human sa linog. Matud niya, dili matagna kung kanus-a moigo ang usa ka kusog nga linog busa kinahanglan nga andam ang tanan sa tanang higayon.
Dugang pa ni Danlag, lahi ang epekto sa usa ka gamay nga linog kumpara sa kusog nga linog sama sa magnitude 7.8 nga nakaangin og daghang kadaot sa kabtangan ug nakaapekto sa daghang komunidad sa Mindanao. Busa kinahanglan nga makat-on ang publiko gikan sa maong kasinatian aron mas epektibo ang ilang pagresponde sa umaabot.
Giduso sa PHIVOLCS ang tanang sektor sa katilingban nga himuong leksyon ang bag-ong kasinatian ug iaplikar ang mga nahibal-an aron mapalig-on ang kahandam ug kaluwasan sa panahon sa umaabot nga mga linog ug uban pang kalamidad.
