GENSAN- Gipahimangnoan ni Nane Danlag, Science Research Analyst sa PHIVOLCS Gensan, ang publiko nga magmatngon batok sa nagkalain-laing fake news ug dili kumpirmadong impormasyon nga nagkatag sa social media may kalabotan sa mga linog.
Matud niya, importante nga mangutana ug mokompirma una sa mga opisyal ug responsable nga ahensya sa dili pa mopakaylap o mo-repost og impormasyon aron malikayan ang kalibog ug kahadlok sa komunidad.
Gipasabot usab ni Danlag nga normal lamang nga adunay mosunod nga gagmayng mga linog o aftershocks nga mahimong moabot sa intensity 1 hangtod 5 human sa kusog nga magnitude 7.8 nga linog, ug posible kini nga magpadayon sulod sa pila ka bulan.
Bisan pa niini, nagpadayon ang rekomendasyon sa PHIVOLCS nga sundon ang “Duck, Cover, and Hold” atol sa linog, ilabina sa mga anaa sa taas nga mga building, tungod kay kasagaran mubo ra ang gidugayon sa pag-uyog ug mahimong delikado ang pagdagan paggawas samtang naglinog.
Giingon niya nga mas maayong manalipod una batok sa posibleng mga mahulog nga debris ug mogawas lamang kung luwas na ang kahimtang.
