Gikatakdang makadawat ang Philippine Air Force (PAF) sa una sa duha ka long-range patrol aircraft (LRPA) sunod tuig gikan sa Israel’s Elbit Systems Limited nga nagpalapad sa ilang kapabilidad sa pagpatrolya sa archipelago.
Matud ni Israel Ambassador to the Philippines Ilan Fluss, ang inisyal nga paghatod sa eroplano gilauman sa tunga-tunga sa 2025, base sa timeline sa gipirmahan nga kontrata.
Gikumpirma sa nasampit nga opisyal, ang pag-anunsyo sa Elbit Systems kaniadtong Hulyo 2023 nga nakadaog kini sa usa ka $114-million nga kontrata sa pagsuplay sa duha ka yunit sa LRPA gilangkoban sa usa ka advanced ug komprehensibo nga mission suite sa usa ka Asia-Pacific country.
Samtang sumala sa Elbit Systems, ang duha ka LRPA ibase sa bag-ong ATR 72-600 ug ang suite naglakip sa mission management system, electro-optics, radar, SIGINT (signals intelligence) ug komunikasyon, ug uban pa.
Ang kontrata ipatuman sulod sa lima ka tuig.
