Nipadayag ug kabalaka ang mga pribadong ospital niadtong Mayo 19 mahitungod sa kapin sa P7 bilyones nga walay bayad nga serbisyo ubos sa programa sa gobyerno nga Medical Assistance for Indigent and Financially Incapacitated Patients (MAIFIP).
Matod sa Private Hospitals Association of the Philippines Inc.(PHAPI), kadudahan kon makadawat pa ba ang ilang mga sakop sa bayad ilabi na nga dunay mga pasyente nga gi-endorso sa mga kandidato nga napildi sa piniliay niadtong Mayo 12, 2025.
Si PHAPI President Jose de Grano niingon nga nabalaka ang mga tambalanan tungod kay dili tanang nibarog isip “sponsor” sa mga pasyente ang nakadaog sa piniliay.
Gibanabana nga 40% sa 1,200 ka miyembrong ospital sa PHAPI ang adunay pending nga mga bayronon nga wala pa madawat gikan sa gobyerno.
Tungod sa kadako sa utang, mahimong maapektuhan ang operasyon sa pipila ka pribadong tambalanan ug ang serbisyong medikal nga ilang gihatag sa nanginahanglan nga mga pasyente.
