Gitangtang ang Pilipinas sa listahan sa “high-risk” money laundering sa European Union (EU).
Kini tungod sa pagkatangtang sa Pilipinas sa grey list sa money laundering nga Financial Action Task Force (FATF) kaniadtong Pebrero.
Gikalipay usab sa European Chamber of Commerce of the Philippines ang pagkatangtang sa nasud gikan sa listahan nga hugot nga ginabantayan sa money laundering ug terrorism financing nga matod niya resulta sa gihingusgan nga pakigbatok sa gobyerno sa maong mga ilegal nga kalihukan.
Ang grupo nagtan-aw niini nga dugang nga pagpausbaw sa pagsalig sa mga mamumuhunan ug pagpasayon sa pinansyal nga mga transaksyon sa mga European counterparts ug pagpakita sa reputasyon sa Pilipinas isip usa ka kasaligan ug madanihon nga destinasyon alang sa pamatigayon ug pamuhunan.
Gawas sa PH, ang Barbados, Gibraltar, Jamaica, Panama, Senegal ug Uganda gitangtang usab sa listahan samtang ang Algeria, Angola, Ivory Coast, Kenya, Laos, Lebanon, Namibia, Nepal, Venezuela, ug Monaco gidugang sa listahan sa mga nasud nga hugot nga gibantayan alang sa money laundering.
Ang gibag-o nga lista sa EU gitakda nga ipaagi sa pagrepaso sa Parliamento sa Europa ug mga estado nga miyembro, ug dayon ipatuman sa sulod sa usa ka bulan kung wala’y mga pagsupak.
