Gisumite na sa Philippine General Hospital sa Sandiganbayan ang medical examination report ni kanhi House Speaker Martin Romualdez nga nag-atubang sa ‘nonbailable’ nga kasong plunder.
Gamiton ang maong report aron matino kung kinahanglan pa bang magpabilin si Romualdez sa PGH o mahimo na siyang ibalhin sa New Quezon City Jail sa Payatas, diin nakapriso usab ang ubang mga indibidwal nga nalambigit sa flood control scam.
Gipaabot nga motambong sa Sandiganbayan karong Lunes si PGH Director Dr. Gerardo Legaspi o ang iyang representante aron ipresentar ang resulta sa independent medical examination ug matino kung aduna pa bay medikal nga rason aron palawigon ang ‘confinement’ ni Romualdez sa ospital.
Samtang, miingon ang Bureau of Jail Management and Penology o BJMP nga ilang ibalhin dayon si Romualdez sa Quezon City Jail kung mao kini ang mando sa Sandiganbayan ug ideklarang igo siya alang sa pagbalhin.
Kung magpabilin siya sa PGH, padayon siyang bantayan sa BJMP sulod ug gawas sa iyang private room, lakip ang palibot sa ospital.
Matud ni BJMP spokesperson Jail Supt. Rex Bustinera, wala silay namonitor nga hulga batok kang Romualdez ug normal gihapon ang sitwasyon sa seguridad sukad nga nasakop siya sa ilang kustodiya niadtong Huwebes.
Gidala si Romualdez sa PGH gikan sa Cardinal Santos Medical Center sa San Juan City niadtong Sabado aron ipasusi human magpagawas og arrest warrant batok kaniya.
Si Romualdez, 62 anyos, nag-atubang sa P7.4 bilyong plunder case nga gisang-at sa Office of the Ombudsman batok kaniya ug tulo pa ka indibidwal tungod sa giingong kickback scheme sa mga flood control project.
Sa iyang motion aron magpabilin sa ospital, giingon ni Romualdez nga aduna siyay Type 2 diabetes, hypertension, primary hypothyroidism ug uban pang mga sakit.
Kung ibalhin sa New Quezon City Jail, ipailalom una si Romualdez sa laing assessment aron matino kung asa nga selda siya ibutang.
Matud ni Bustinera, kasagarang ipahimutang ang mga persons deprived of liberty o PDL uban sa ubang detainees ug dili sa single-occupancy cell. Alang sa mga adunay sakit, mas luwas usab matod pa nga adunay kauban sa selda aron adunay makatabang kung adunay emergency.
Adunay kapin 3,200 ka PDL ang Quezon City Jail, kon itandi sa gibanabanang kapasidad niini nga 4,200 hangtod 4,300 ka detainees nga dili pa makaresulta sa overcrowding.
Aduna usab 27 ka bakanteng selda sa bag-ong gi-renovate nga building sa pasilidad, gawas pa sa mga bakanteng selda sa infirmary.
Ang matag selda adunay gilapdon nga 50 square meters ug adunay lima ka double-decker beds nga mahimong makapuyo og hangtod 10 ka PDL.
Aduna usab kini og in-house doctor, 24-hour nurses ug basic medical facilities lakip ang X-ray ug laboratory services.
Samtang, sumala sa BJMP, mga doktor ug abogado pa lamang ni Romualdez ang miduaw kaniya sukad nga gidala siya sa PGH. Wala matod pa siya maduaw sa iyang mga paryente o higala.
Gikatakda usab nga moadto sa PGH si Pangulong Ferdinand Marcos Jr. karong Lunes sa buntag, apan wala pa ipagawas ang rason sa iyang pagbisita ug wala usab maklaro kung duawon ba niya si Romualdez.
