GENERAL SANTOS CITY – Personal nga bangi maoy pinakaduol nga motibong ginatutukan sa kapulisan sa pagpamusil patay sa biktimang si Heaver Ventelacion Pasion, residente sa Purok 2, NLSA Road, Barangay Lagao, GenSan sa niadtong adlaw nga Martes, Setyembre 13, 2022.
Matud ni Police Lt. Wenceslao Imperial, ang deputy Chief sa Lagao Police Station, aduna nay record nga pila na kahigayon gireklamo ang biktima human iyang gisarado ang dalan nga agi sa iyang gipanag-iyahang luna.
Blangko pa sa karon ang kapulisan sa ilhanan sa mga suspek.
Pagsaysay sa mga residente sa lugar nga nakamotorsiklo ang mga responsable. May nakakita sa dagway sa back rider gumikan wala kini naka-face mask. Samtang ang driver sa motor ang nakataptap ang nawong.
Kahinumduman nga samtang ang biktima nanilhig sa ilang tugkaran, gipusil kini sa mga suspek nga nakamotorsiklo. Unom ka mga samad ang naangkon sa nahisgutan nga hinungdan sa iyang kamatayon.
