GENERAL SANTOS CITY – Personal grudge ang gituuhang motibo sa pagpamusil miaging gabii sa GenSan Slaughter House sa Brgy Mabuhay ning siyudad, kung asa usa ang angol ug usa ang patay.
Kahibaluan nga napatay giilang si Alger Sumundong, hamtong ang pangidaron, taga-Prk Intake sa nasampit nga barangay, samtang ang kauban niini nga nasamdan sa insidente mao si Banay ALano, 44-anyos, matadero sa slaughter house.
Matud ni P/Capt. Davis Dulawan, hepe sa San Isidro Police Station, kanhi nang nabilanggo sa ilang presinto gumikan sa kasong direct assault ug grave threat, apan nakapiyansa.
Nasayran usab gikan sa mga silingan sa biktima nga kanunay kining gamugna ug kagubot sa ilang lugar.
Kahibaluan nga base sa inisyal nga imbestigasyon, gapangape ang duha ka biktima pasado alas-12:00 sa tungang gabii, kalit miabot ang duha ka motorsiklo kung asa duha ka mga suspek ang minaog ug usa ang namusil sa mga biktima dayon paspas nga misibat.
Gituuhang si Sumundong gayud ang target sa mga suspek. Narekober sa crime scene ang duha ka fired cartridges nga gisumite na sa PNP Crime Lab aron mailhan ang mga suspek, samtang nagpadayon usab ginahimong imbestigasyon sa kapulisan.
