GENERAL SANTOS CITY – Negatibo ang resulta sa usa ka Person Under Investigation kon PUI dinhi sa dakbayan human nga migawas ang resulta sa gipahigayong confirmatory test sa Research Institute for Tropical Medicine o RITM.
Sa pakighinabi sa Bombo Radyo Gensan kang Dr. Imelda Quiñones, medical officer IV sa Department of Health(DOH)12, gibutyag niini nga wala pa nahuman ang 14 ka adlaw nga quarantine apan negatibo kini sa 2019 novel corana virus kon 2019NcoV.
Matud kang Dr. Quiñones nga bisag negatibo ang resulta, kinahanglan nga ipailalom gihapon sa 14 ka adlaw nga quarantine ang nasampit
Gikadugang pa ni Dr. Quiñones nga ang ilang ahensya sa padayong nagmonitor ug nangalap ug impormasyon aron masigurado nga luwas ang maong PUI.
Nasayran nga ang nasampit nga PUI gikan sa Guangzhou China nga kung asa sa maung nasud nagsugod ang maung sakit.
Samtang dinhi sa Rehiyon 12, 24 ang gipailalom sa Patient Under Monitoring kon PUM tungod nakabiyahe sa mga nasud nga adunay natalang kaso sa 2019NcoV.
