Nagpadayon karon ang Provincial Environment and Natural Resources Office (PENRO) sa Sarangani sa ilang assessment kalabot sa coastal uplift nga nasinati sa pipila ka mga lugar sa probinsya niadtong milabayng semana.
Ang maong panghitabo nakamugna og kabalaka ug kahadlok sa mga residente human mamatikdan ang pagtaas sa bahin sa baybayon ug kausaban sa kahimtang sa kadagatan sa apektadong mga komunidad.
Sumala sa PENRO, padayon ang ilang pagmonitor ug pagkuha sa mga datos aron masuta ang tinuod nga gidak-on sa epekto sa coastal uplift ug ang posibleng kalambigitan niini sa mga seismic activities nga nasinati sa rehiyon.
Gipasalig usab sa ahensya nga ilang ipahibalo dayon sa publiko ang resulta sa assessment aron matabangan ang mga residente ug lokal nga panggamhanan sa pagplano sa mga angay nga lakang alang sa kaluwasan sa komunidad.
