Nipadayag ang Partido Demokratiko Pilipino Lakas ng Bayan (PDP Laban) sa ilang dakong kalagot ug pagkondenar sa ilang giingon nga dinalidali ug salingkapaw nga impeachment sa House of Representatives ni Bise Presidente Sara Duterte nga nakadawat og 32.2 milyones ka boto sa 2022 nga piniliay, ang ‘most-voted candidate’ sa kasaysayan sa Pilipinas.
Sa usa ka pamahayag, ang partido nga gipangulohan sa amahan ni VP Sara nga si kanhi Presidente Rodrigo Duterte, niingon nga kini usa ka dayag nga pagpakita sa hugaw nga politika, pagtamay sa soberanya nga kabubut-on sa katawhang Pilipino ug walay pulos nga pag-abuso sa gahum.
Klaro niyang giingon nga ang impeachment batok sa Bise Presidente gihimo sa mga desperado nga sakop sa Ubos Balay Balauranan sa Kongreso aron ipahilayo ang nagkagrabeng kahimtang sa nasud.
Aron usab gub-on ang pagsalig sa Ikaduhang Presidente nga modagan sa mas taas nga posisyon sa 2028 nga eleksyon.
Gihisgutan usab sa partido nga si Presidente Ferdinand Marcos Jr. sa Kamara nga hunongon ang impeachment complaint ug sulbaron ang mga problema nga giatubang sa mga ordinaryong Pilipino.
Busa nganong wala na lang niya sulbaron ang nagkadakong ‘‘disconten5t ug ‘‘frustration’ sa nasud nga resulta sa nagkagrabeng kalinaw ug kahusay, graft and corruption ug kakabos.
Sa katapusan, giawhag sa partido ang tanang Filipino nga botante nga pilion pag-ayo kon kinsa ang ilang iboto ilabi na sa Senado diin ang kapalaran ni VP Sara maoy mahukman sa impeachment.
Ang hearing sa impeachment case ni VP Sara gikatakdang ipahigayon sa Hunyo, human sa Mayo 2025 nga eleksyon ug dungan sa pagbalik sa sesyon sa Kongreso.
