GENERAL SANTOS CITY – Nag-step up kon mas gipakusgan pa karon sa Philippine Drug Enforcement Agency (PDEA) ang ilang pagpaningkamot alang sa kampanya sa gobyerno batok sa iligal nga droga.
Lakip niini ang mas hugot nga pagmonitor sa mga airports ug pantalan, aron malikayan nga may mapayuhot nga iligal nga droga.
Ug gani, dinhi sa Rehiyon 12, ilawom sa pagdumala ni PDE-12 Director Jet Cariño, nagpahigayon matud pa sila ug pag-inspeksyon sa General Santos City Airport, dili pa lamang dugay.
Katambayayong nila ang Civil Aviation Authority of the Philippines (CAAP). Gituyok sa K9 Team sa PDEA-12 nga gilangkuban sa upat ka trained Canine Handlers ugd duha ka Narcotic Detection Dogs.
Kahibaluan nga ang naasoy’ng airport ang bugtong tugpahanan sa eroplano dinhi sa rehiyon, kung asa walo ngadto sa napulo ka mga flights ang matala matag adlaw.
Gawas sa airport, gisuroyan usab nila ang mga sakayang pangdagat sa usa ka private fishing company sa Tambler, ning siyudad.
Ang naasoy’ng lakang ang base matud pa sa kamanduan ni Directior General Aaron Aquino nga mag-step up sa ilang kampanya batok sa illegal drugs.
