GENERAL SANTOS CITY – Samtang, nagpaklaro si PDEA-12 Director Gil Cesario Castro sa greyhound operation nga ilang gipahigayon sa Amas Provincial Jail sa North Cotabato kagahapon.
Sa pakighinabi sa Bombo radyo gibutyag ni Dir. Castro, nakadawat sila og intelligence report nga atakehon sa dautang grupo ang maong detention facility hinungdan nga giunhan na nila ang mga nasampit pinaagi sa pagpahigayon og operasyon.
Matud pa, adunay nakumpiska nga mga IED component nga pamatuod lamang nga ‘reliable’ ang nakuha nga impormasyon. Nakit-ang terorya sa PDEA nga pabuthon ang provincial jail aron iikyas ang mga high profile inmates nga gilakipan sa mga terorista, bomber og kidnaper.
Samtang, gibutyag ni Dir. Castro, itugyan ngadto sa BJMP ang pag-imbestiga kalabot sa hilabihan kadaghang resibo sa money transfer nga nakumpiska atol sa operasyon.
Katingalaan nganong anaa kini sulod sa detention facility kon asa angayang masayran kon unsa ang transaksyon sa nagpadala niini sa salapi og kinsa ang gadawatan sulod sa maong bilangguan.
Ang planong pag-atake sa Amas Provincial Jail ang ipahigayon unsa mang adlaw basi sa nadawat nga intelligence report aron i-rescue ang mga high profile inmates alang sa ipahigayong criminal og terroristic plan.
