GENERAL SANTOS CITY – Nagmando na si PNP City Director Col. Edilberto Tuzon nga dili na padugayon ang pagsulbad sa General Santos City Police Office kalabutan sa bangi nga gikalambigitan sa usa ka pulis ug usa ka motorista sa Brgy. Mabuhay kaniadtung April 26 nga nagresulta sa pagpabuto ug pusil.
Matud ni Col. Tuzon, gihatagan niya og timeline nga usa ka semana aron humanon ang imbestigasyon og angayang adunay aksyon nga himuon human sa panghitabo.
Gisiguro sa opisyal nga patas ang pagahimuong imbestigasyon sa gikalambigitang “road rage” incident tungod dili konsentihon sa ilahang organisasyon kung mapamatud-ang adunay tulubagon ang nahisgutang pulis.
Sa pamahayag ni Tuzon nga gibutang na sa City Personnel and Accounting unit si Police Master Sergeant Bruce Buduan samtang nagpadayon ang imbestigasyon.
Nag-ugat ang kaso human malambigit sa lalis sa trapiko ang pulis ug usa ka motorista, diin misangko sa mainitong komprontasyon.
Subay sa reklamo, gikataho nga anaa matod pa sa impluwensiya sa ilimnong makahubog si Buduan niadtung higayona, diin, nagpabuto pa kini sa iyahang armas.
Apan sumala ni Tujzon nga usa sa susihon sa imbestigasyon kung sa unsa nga punto nga nagpabuto sa iyang service pistol si Budu-an luyo nga walay gikataho nga naigo sa pagpabuto niini sa pusil.
Tugkaron usab sa imbestigasyon ang tinuod nga sinugdanan sa mainitong lantugi nga nagresulta sa pagpanghapak ug helmet ug pagsumbag ngadto sa pulis hinungdan kini nagpabuto.
Nahibaw-an nga pauli na sa Klinan Singko ang pulis dihang nalambigit sa insidente.
