Gisubay ug giimbestigahan na sa Presidential Communications Office (PCO) ang mga online account nga nagpakaylap og sayop nga impormasyon nga nadakpan na si Senador Ronald “Bato” dela Rosa ug dad-on na sa International Criminal Court (ICC) sa The Hague, Netherlands.
Sumala ni Communications Usec. Claire Castro, gimando na ni PCO Secretary Dave Gomez sa Anti-Fake News Desk nga susihon ang tanang account nga nagpakaylap og bakak nga impormasyon, lakip na ang walay basehang balita bahin sa giingong pagdakop sa senador.
Matod pa sa Malacañang, apil sa mga prayoridad nga gitutokan sa gobyerno ang pagsumpo sa fake news ug sa mga nagpakaylap niini.
Una nang gipanghimakak sa Malacañang ang mga balita nga nadakpan na si Dela Rosa, ug giingong gigamit lamang kini aron ibalhin ang atensyon sa publiko gikan sa nagpadayon nga impeachment trial ni Vice President Sara Duterte.
Samtang, gipadayag usab sa Malacañang nga nagpadayon ang pagpangita sa kinaroronan ni Dela Rosa aron matuman ang warrant of arrest batok kaniya. Apan, ilang gitugyan sa mga may katungdanang ahensya ang pagkomento kung nganong naglisod ang mga awtoridad sa pagserbisyo sa maong warrant batok sa senador.
