Napugngan sa Philippine Coast Guard (PCG)og Philippine Drug Enforcement Agency (PDEA) ang usa ka barko nga nagsulay nga magpasulod og dakong bulto sa iligal nga droga sa Pilipinas.
Sumala sa PCG, ang maong barko ang anaa pa sa gawas sa exclusive economic zone (EEZ) sa Pilipinas duol sa Mindoro.
Sumala kay PCG commandant, Admiral Ronnie Gil Gavan, gipahigayon sa duha ka ahensiya ang operasyon bisan pa sa dili maayong panahon.
Gamit ang mga maritime assets sa PCG, nahimo nilang pugngan ang barko nga musulod sa teritoryo sa Pilipinas og maabog kini palayo sa nasod.
Gituohan nga may unod ang maong barko nga hangtod sa lima ka tonelada sa shabu nga gibanabanaan nga nagkantidad og P34 billion.
Kini base usab sa intelligence report nga gihuptan sa PDEA.
Gibutyag ni PDEA spokesman Joseph Frederick Calulut nga base sa ilang intel report, pasulod unta ang barko sa Pilipinas kung wala kini napugngan sa mga otoridad.
Sa kasamtangan, wala pa gipagawas sa PCG ang ilhanan sa barko og kung asa kini gikan.
