Gimanduan ni Presidente Ferdinand Marcos Jr. ang Department of Budget and Management (DBM) ug ang Department of Public Works and Highways (DPWH) sa pagpahigayon og sweeping review sa budget sa ahensya alang sa fiscal year 2026.
Ang direktiba sa presidente nahitabo human gibutyag ni Deputy Speaker Ronaldo Puno ug Marikina Representative Marcelino Teodoro nga adunay mga kwestyonableng programa nga gisingit sa 2026 national budget.
Matod ni Palace Press Officer USec. Claire Castro, ang Presidente nagpasalig nga ang mga kuwestiyonableng pagsingit sa nasudnong budget ang tanggalon pinaagi sa errata.
Gusto usab sa Presidente nga himuon ang mga kausaban sa 2026 budget sa DPWH aron maseguro ang transparency ug accountability.
Gipaniguro usab sa Presidente nga ang mga proyekto nga nalakip sa 2026 national budget makahatag ug kaayohan sa katawhan.
Sa laing bahin, masaligon si Castro nga ma-review dayon nila ni Budget Secretary Amenah Pangandaman ug DPWH Secretary Vince Dizon ang budget sa ahensya ilabi na nga nagsugod na ang budget deliberations sa House Appropriations Committee.
