Naghatag og mensahe si Pangulong Ferdinand Marcos Jr. ngadto sa mga kabatan-onan, estudyante, ug mga ginikanan human sa sunod-sunod nga mga trahedya nga nahitabo sa pipila ka mga eskwelahan sa nasud.
Nanawagan ang Presidente og hiniusang lihok aron mapanalipdan ang mga kabatan-onan batok sa kapintasan, kakulang, ug uban pang mga peligro. Matod niya, ang eskwelahan kinahanglan mahimong lugar sa pagkat-on, pagtukod sa mga pangandoy, ug paglambo, dili usa ka lugar nga kahadlokan sa mga ginikanan alang sa kaluwasan sa ilang mga anak.
Gimandoan usab ni Pangulong Marcos ang mga ahensya sa edukasyon, kapulisan, panglawas, ug mga lokal nga panggamhanan nga dugangan pa ang mga lakang alang sa kaluwasan sa mga estudyante sa tibuok nasud.
Gidasig usab sa Pangulo ang mga ginikanan nga maghatag og panahon, pagtagad, ug pagsabot ngadto sa ilang mga anak tungod kay dinhi nagsugod ang tinuod nga proteksyon.
Gipasiugda usab sa Pangulo nga ang pagpangayo og tabang dili timailhan sa kahuyang.
