Gikompirma ni Palace Press Office Usec. Claire Castro nga adunay standing order si President Ferdinand Marcos Jr. aron dakpon si Senador Ronald “Bato” dela Rosa.
Matod niya, nagpadayon ang operasyon sa mga may kalabotang ahensya sa gobyerno aron ipatuman ang maong mando.
Dugang pa ni Usec. Castro, ilang itugyan sa Department of Justice (DOJ) ug Department of the Interior and Local Government (DILG) ang pagtubag sa mga pangutana ug hagit may kalabotan sa pagdakop sa senador, tungod kay sila ang mas nahibalo sa mga operasyon nga gikinahanglan aron mapaspasan ang pagpatuman sa maong pag-aresto.
Sa pagkakaron, gipangita sa mga awtoridad si Dela Rosa human nagpagula ang International Criminal Court (ICC) og warrant of arrest batok kaniya. Bisan pa niini, gipasiguro ni DILG Secretary Jonvic Remulla nga sundon sa mga awtoridad ang hustong legal nga proseso sa dili pa ipatuman ang posibleng extradition sa senador ngadto sa laing nasud.
Usa si Dela Rosa sa mga ginganlan sa ICC nga giingong co-perpetrator ni kanhi Presidente Rodrigo Duterte sa kasong crimes against humanity, nga may kalabotan sa giingong mga pagpatay atol sa kampanya batok sa ilegal nga droga.
Si Dela Rosa nagsilbi isip hepe sa Philippine National Police (PNP) ubos sa administrasyon ni Duterte ug maoy nangulo sa pagpatuman sa mga operasyon sama sa Oplan Tokhang ug Project Double Barrel.
Sa laing bahin, nagpadayon sa iyang baruganan si Dela Rosa ug ang iyang legal nga abogado nga wala matod pa’y hurisdiksyon o legal nga basehan ang ICC sa pag-aresto sa usa ka Pilipino nga walay otorisasyon gikan sa mga lokal nga hukmanan.
