Gipangunahan ni President Ferdinand Marcos Jr. ang pag-turn-over ug inspeksyon sa Learning Continuity Space (LCS) atol sa paglusad sa YAKAP ug Kalinga Caravan sa Marcelo B. Fernan-Polambato Elementary School sa Bogo City, Cebu niadtong Lunes sa buntag.
Ang LCS nagsilbing alternatibong classroom para sa mga estudyante aron masiguro ang padayon nga pagkat-on para sa mga estudyante nga nawad-an sa ilang mga classroom tungod sa mga katalagman.
Giubanan sa Presidente sa paghatag og serbisyo ang Unang Ginang nga si Liza Araneta Marcos nga mibisita sa nahisgutang eskwelahan.
Atol sa kalihokan, gihatag ang mga batakang serbisyo sa panglawas sa mga estudyante ug magtutudlo ingon man sa lokal nga komunidad nga naapektuhan sa linog pinaagi sa YAKAP ug Kalinga Caravan.
Pinaagi niini, ang mga magtutudlo, estudyante, ug ang ilang mga pamilya nga adunay huyang nga resistensya gihatagan og libreng check-up, laboratory test, ug libreng tambal.
Adunay usab pagparehistro sa PhilHealth ug pag-update sa ilang mga rekord aron masiguro nga daghang mga tawo ang maka-access sa mga programa sa panglawas sa gobyerno.
