Gisugyot ni Pangulong Ferdinand Marcos Jr. ngadto sa Kongreso ang temporaryong pagsuspinde sa pagpatuman sa Real Property Valuation and Assessment Reform Act (Republic Act No. 12001) aron malikayan ang dugang nga gasto sa mga negosyo, mapalambo ang pagpamuhunan, ug masiguro ang hapsay nga pagbalhin ngadto sa bag-ong sistema sa pagtakda sa bili sa mga kabtangan.
Gihimo sa Pangulo ang maong pahayag atol sa Legislative-Executive Development Advisory Council (LEDAC) meeting sa Malacañang niadtong Agosto 6.
Sumala ni Palace Press Officer Claire Castro, tumong sa maong sugyot nga hatagan og igong panahon ang pagpatuman sa bag-ong valuation system.
Sa maong LEDAC meeting, gihisgutan usab ang 24 ka priority measures nga target mapasar sa Kongreso sa dili pa matapos ang Hunyo 2027.
Matud ni Castro, gisugyot ni Pangulong Marcos Jr. sa duha ka kapulungan sa Kongreso ang temporaryong pagsuspinde sa pagpatuman sa Real Property Valuation and Assessment Reform Act o Republic Act No. 12001 (RPVARA) aron malikayan ang dugang nga gasto sa mga kabtangan alang sa mga negosyo, masuportahan ang mga pamuhunan, ug masiguro ang hinay-hinay ug makatarunganong transisyon ngadto sa bag-ong sistema sa paghatag og bili sa mga property.
