Mapasigarbuhon si President Ferdinand Marcos Jr. nga ang gobyerno mipaubos sa unemployment rate ngadto sa 4.3 porsyento sa 2024, ang pinakaubos nga natala sa miaging 20 ka tuig.
Kini ang gipahibalo sa Presidente atol sa iyang pagtambong sa ika-123 nga selebrasyon sa Labor Day sa Pasay City kagahapon
Matod sa Presidente, tungod sa kusog nga ekonomiya, ang gobyerno nakab-ot ang pinakaubos nga unemployment rate percentage ug padayon kining nagkunhod base sa record niadtong Pebrero.
Kining maayong rekord, matod sa Presidente, tungod sa kaagresibo sa gobyerno sa pagdani ug dugang mga puhunan sa Pilipinas.
Gikan sa 2022 ngadto sa 2024, ang Pilipinas nakatala ug gibanabana nga US$27 bilyones nga puhunan nga gilaumang makahatag ug 350,000 ka trabaho para sa mga Pilipino.
Tungod niini, ang Presidente miingon nga sila magpadayon sa pagtrabaho aron daghang mga puhunan ang madala sa nasud alang sa pag-uswag sa ekonomiya ug dugang nga panginabuhian.
